Si d’ ‘a Giojusa ‘u nume tu rispíetti,
quandu ‘e manciare duni a ri ‘mbitati
si nde van’ iɖɖi ccu ri díenti stŗutti
ppecchí ccu ccore séntenu ha’ tŗattati.
Giojusa è ru nume ‘e sta contŗada
ppecchí le dû ru sule frutti bíeddi,
de raggi li nde spande ‘nna quadara,
de gioja l’aria l’inchjenu l’acíeɖɖi.
Mo ca ‘u juornu fai d’ ‘u compleannu,
tŗattete buonu, tŗatta buoni ‘ amici,
ca nde va’ buonu tu ppe ttuttu l’annu.
Yuri, te fazzu tanti aguri ‘ntisi:
pped’ oje, ppe ddomane, ppe ccent’anni
godissi l’ure, i juorni, i nuotti, i misi!
Petŗamale, ‘u vintuottu ‘e frevaru d’ ‘u duemilaeqquattordici
Franco Pedatella
Franco Pedatella 